० पढमं अज्झयणं-विनयसुयं ०
[१] संजोगा विप्पमुक्कस्स, अनगारस्स भिक्खुणो ।
विनयं पाउकरिस्सामि, आनुपुव्विं सुणेह मे ।।
[२] आणानिद्देसकरे, गुरुणमुववायकारए ।
इंगियागारसंपन्ने, से विनीए त्ति वुच्चई ।।
[३] आणाऽनिद्देसकरे, गुरुणमनुववायकारए ।
पडिनीए असंबुद्धे, अविनीए त्ति वुच्चई ।।
[४] जहा सुणी पूइकण्णी, निक्कसिज्जई सव्वसो ।
एवं दुस्सीलपडिनीए, मुहरी निक्कसिज्जइ ।।
[५] कणकुंऽगं चइत्ताणं, विट्ठं भुंजइ सूयरो ।
एवं सीलं चइत्ताणं, दुस्सीले रमई मिए ।।
[६] सुणियाऽभावं साणस्स, सुयरस्स नरस्स य ।
विनए ठवेज्ज अप्पाणं इच्छंतो हियमप्पणो ।।
[७] तम्हा विनयमेसिज्जा, सीलं पडिलभेज्जओ ।
बुद्धपुत्त नियागट्ठी, न निक्कसिज्जइ कण्हुई ।।
[८] निसंते सिया अमुहरी, बुद्धाणं अंतिए सया ।
अट्ठजुत्ताणि सिक्खिज्जा, निरट्ठाणि उ वज्जए ।।
[९] अनुसासिओ न कुप्पिज्जा, खंतिं सेविज्ज पंडिए ।
खुड्डेहिं सह संसग्गिं, हासं कीडं च वज्जए ।।
[१०] मा य चंडालियं कासी, बहुयं मा य आलवे ।
कालेणं य अहिज्जित्ता, तओ झाइज्ज एगओ ।।
[११] आहच्च चंडालियं कुट्टु, न निण्हइज्ज कयाइ वि ।
कडं कडे त्ति भासेज्जा, अकडं नो कडे त्ति य ।।
[१२] मा गलियस्सेव कसं, वयणमिच्छे पुणो पुणो ।
कसं व दट्ठुमाइण्णे, पावगं परिवज्जए ।।
[१३] अनासवा थूलवया कुसीला, मिउंपि चंडं पकरेंति सीसा ।
चित्ताणुया हु दक्खोववेया, पसायए ते हु दुरासयंपि ।।
[१४] नापुट्ठो वागरे किंचि, पुट्ठो वा नालियं वए ।
कोहं असच्चं कुवेज्जा, धारेज्जा पियमप्पियं ।।
[१५] अप्पा चेव दमेयव्वो, अप्पा हु खलु दुद्दमो ।
अप्पा दंतो सुही होइ, अस्सिं लोए परत्थ य ।।
[१६] वरं मे अप्पा दंतो, संजमेण तवेण य ।
माऽहं परेहि दम्मंतो, बंधणेहिं वहेहि य ।।
[१७] पडिनीयं च बुद्धाणं, वाया अदुव कम्मुणा ।
आवी वा जइवा रहस्से, नेव कुज्जा कयाइवि ।।
[१८] न पक्खओ न पुरओ, नेव किच्चाण पिट्ठओ ।
न जुंजे ऊरुणा ऊरुं, सयणे नो पडिस्सुणे ।।
[१९] नेव पल्हत्थियं कुज्जा, पक्खपिंडं च संजए ।
पाए पसारिए वाऽवि, न चिट्ठे गुरुणंतिए ।।
[२०] आयरिएहिं वाहित्तो, तुसिणीओ न कयाइ वि ।
पसायट्ठी नियागट्ठी, उवचिट्ठे गुरुं सया ।।
[२१] आलवंते लवंते वा, न निसीएज्ज कयाइ वि ।
चइऊणं आसनं धीरो, जओ जुत्तं पडिस्सुणे ।।
[२२] आसनगओ न पुच्छेज्जा, नेव सेज्जागओ कयाइ वी ।
आगम्मुक्कडुओ संतो, पुच्छिज्जा पंजलीउडो ।।
[२३] एवं विनयजुत्तस्स, सुत्तं अत्थं च तदुभयं ।
पुच्छमाणस्स सीसस्स, वागरिज्ज जहासुयं ।।
[२४] मुसं परिहरे भिक्खू, न य ओहारिणिं वए ।
भासादोसं परिहरे, मायं च वज्जए सया ।।
[२५] न लवेज्ज पुट्ठो सावज्जं, न निरट्ठं न मम्मयं ।
अप्पणट्ठा परट्ठा वा, उभयस्संतरेण वा ।।
[२६] समरेसु अगारेसुं, गिहसंधीसु य महापहेसु ।
एगो एगत्थिए सद्धिं, नेव चिट्ठे न संलवे ।।
[२७] जं मे बुद्धाणुसासंति, सीएण फरुसेण वा ।
मम लाभो त्ति पेहाए, पयओ य तं पडिस्सुणे ।।
[२८] अनुसासनमोवायं, दुक्कडस्स य चोयणं ।
हियं तं मन्नए पण्णो, वेसं होइ असाहुणो ।।
[२९] हियं विगयभया बुद्धा, फरुसंपि अनुसासणं ।
वेसं तं होइ मूढाणं, खंतिसोहिकरं पयं ।।
[३०] आसने उवचिट्ठेज्जा, अणुच्चे अकुए थिरे ।
अप्पुट्ठाई निरुट्ठाई, निसीएज्जऽप्पकुक्कुए ।।
[३१] कालेण निक्खमे भिक्खू, कालेण य पडिक्कमे ।
कालं च विवज्जिता, काले कालं समायरे ।।
[३२] परिवाडीए न चिट्ठेज्जा, भिक्खू दत्तेसणं चरे ।
पडिरूवेण एसित्ता, मियं कालेण भक्खए ।।
[३३] नाइदूरमणासन्ने, नन्नेसिं चक्खुफासओ ।
एगो चिट्ठेज्ज भत्तट्ठा, लंघित्ता तं नइक्कमे ।।
[३४] नाइउच्चे व नीए वा, नासन्ने नाइदूरओ ।
फासुयं परकडं पिंडं, पडिगाहेज्ज संजए ।।
[३५] अप्पपाणेऽप्पबीयंमि, पडिच्छन्नंमि संवुडे ।
समयं संजए भुंजे, जयं अपरिसाडियं ।।
[३६] सुकडित्ति सुपक्कित्ति, सुच्छिन्ने सुहडे मडे ।
सुनिट्ठिए सुलद्धित्ति, सावज्जं वज्जए मुनी ।।
[३७] रमए पंडए सासं, हयं भद्दं व वाहए ।
बालं संमइ सासंतो, गलियस्सं व वाहए ।।
[३८] खड्डुया मे चवेडा मे, अक्कोसा य वहा य मे ।
कल्लाणमनुसासंतो, पावदिट्ठित्ति मन्नई ।।
[३९] पुत्तो मे भाय नाइ त्ति, साहू कल्लाण मन्नई ।
पावदिटठि उ अप्पाणं, सासं दासे त्ति मन्नई ।।
[४०] न कोवए आयरियं, अप्पाणंपि न कोवए ।
बुद्धोवघाई न सिया, न सिया तोत्तगवेसए ।।
[४१] आयरियं कुवियं नच्चा, पत्तिएण पसायए ।
विज्झवेज्ज पंजलीउडो, वएज्ज न पुणोत्तिय ।।
[४२] धम्मज्जियं च ववहारं, बुद्धेहायरियं सया ।
तमायरंतो ववहारं, गरहं नाभिगच्छई ।।
[४३] मनोगयं वक्कगयं, जाणित्तायरियस्स उ ।
तं परिगिज्झ वायाए, कम्मुणा उववायए ।।
[४४] वित्ते अचोइए निच्चं, खिप्पं हवइ सुचोइए ।
जहोवइट्ठं सुकयं, किच्चाइं कुव्वई सया ।।
[४५] नच्चा नमइ मेहावी, लोए कित्ती से जायए ।
हवई किच्चाणं सरणं, भूयाणं जगई जहा ।।
[४६] पुज्जा जस्स पसीयंति, संबुद्धा पुव्वसंथुया ।
पसन्ना लाभइस्संति, विउलं अट्ठियं सुयं ।।
[४७] स पुज्जसत्थे सुविनीयसंसए, मनोरुई चिट्ठइ कम्मसंपया ।
तवोसमायारिसमाहिसंवुडे, महज्जुई पंच वयाइं पालिया ।।
[४८] स देवगंधव्वमनुस्सपुइए, चइत्तु देहं मलपंकपुव्वयं।
सिद्धे वा हवइ सासए देवे आ अप्परए महिड्ढिए ।। त्ति बेमि